Податоци за сомнение за сторено кривично дело „бесправно градење” прибавила синоќа полицијата на терен по добиените сознанија околу активностите за изградба на водоводна мрежа во тетовското село Синичане. Податоци и информации се прибавени и до Основното јавно обвинителство Тетово. Според портпаролот во МВР Тони Ангеловски, присуството на полициски службеници е во функција на обезбедување на јавниот ред и мир.
„Наша задача е единствено да бидат преземени сите законски мерки, со цел да се спречи нарушување на јавниот ред и мир на таа локација, за да не дојде до несакани настани со посериозни последици по мирот и безбедноста на граѓаните и тоа ќе го правиме се додека постои безбедносна проценка дека тоа може да се случи“, истакна Тони АНгеловски.
Во врска со координацијата и соработката со Јавното обвинителство, тој нагласи дека МВР соработува со обвинителството во сите случаи, како и во овој случај околу истрагата што ја води обвинителството.
„Ние како институција што е задолжена за одржување на јавниот ред и мир имаме оперативни сознанија и неколку конкретни пријави од локални жители за опасност од сериозно нарушување на јавниот ред и мир и поради тоа, на тоа место има полициски службеници. Полицијата е сервис на сите граѓани и е должна да постапи во вакви случаи“, посочи Тони Ангеловски.
Во врска со тоа дали и каде треба да се гради водовод, од МВР потенцираа дела тие немаат апсолутно никакви ингеренции и дека за тоа одлучуваат други институции.