Милитантната група Хезболах избра нов лидер Наим Касем.
Тој ќе го наследи Хасан Насрала, кој беше убиен во израелските воздушни напади врз Бејрут на 27 септември.
САД го прогласија Хезболах за терористичка организација, додека Европската унија го стави на црната листа само вооруженото крило на организацијата, но не и политичката партија. Политичката партија на Хезболах има места во либанскиот парламент.
Хезболах е основан пред 40 години со помош на Иран, а Насрала се приклучи на групата во 1982 година.
На чело со Насралах, Хезболах разви блиски врски со вооружените групи и други поддржани од Техеран, помагајќи во обуката и вооружувањето на нивните борци.
Хезболах, како и палестинската милитантна организација Хамас, е поддржан од Иран.
По ликвидацијата на Насрала, една недела подоцна, Израелците го убиле и неговиот очекуван наследник Хашем Сафиедин.
Касем, кој е роден во Бејрут во 1953 година во семејство со јужно потекло во близина на границата со Израел, е заменик генерален секретар на Хезболах од 1991 година, кога беше именуван за заменик командант по Абас ал Мусави, водач на групата убиен во израелски напад во 1992 година.
Касем ја задржа својата позиција кога Насрала ја презеде власта.
Откако Насрала исчезна од очите на јавноста по војната на Хезболах со Израел во 2006 година, Касем стана јавна личност на групата, често служејќи како портпарол на Хезболах.
Касем е вклучен во организирањето на изборните кампањи на Хезболах за либанскиот парламент откако групата првпат учествуваше на изборите во 1992 година.
Во последниве недели, Израел спроведува кампања на копнени и воздушни напади против јужен Либан насочени кон раководството на Хезболах како одговор на бројните ракетни напади на групата.
Тие напади се интензивираа откако израелската армија започна голема офанзива во Појасот Газа по смртоносниот напад на Хамас врз Израел на 7 октомври минатата година, за да го искорени Хамас.
Израел го уби највисокото раководство на Хамас, но во војната загинаа повеќе од 43.000 луѓе, според Министерството за здравство на Газа.
За време на нападот врз Израел на 7 октомври, палестинските милитанти зеле 251 заложник, и војници и цивили. Некои од нив се разменети за Палестинци кои ги држи Израел, но 97 се уште се во Појасот Газа. Израелското министерство наведува дека 34 од нив се мртви.