Највисоката здравствена агенција во Африка прогласи појава на епидемија на ебола во источната провинција Итури во Демократска Република Конго.
Околу 246 случаи и 65 смртни исходи се пријавени, главно во рударските градови Монгвалу и Рвампара, соопшти Африканскиот центар за контрола и превенција на болести (Африка ЦДЦ).
Во соопштението објавено во петок се додава дека се организира состанок со Демократска Република Конго, Уганда, Јужен Судан и други меѓународни партнери за координација на мерки за одговор и прекуграничен надзор.
Еболата првпат била откриена во 1976 година на територијата на денешна ДР Конго и се смета дека потекнува од лилјаци. Ова е 17-та епидемија на оваа смртоносна вирусна болест во земјата.
Болеста се пренесува преку директен контакт со телесни течности и предизвикува тешко крвавење и откажување на органите.
Раните симптоми вклучуваат треска, болки во мускулите, замор, главоболка и болки во грлото. За еболата нема лек.
Прелиминарни тестови спроведени во Националниот институт за биомедицински истражувања (ИНРБ) во главниот град Киншаса откриле присуство на вирусот во 13 од 20 анализирани примероци, по консултации со Министерството за здравство и Националниот институт за јавно здравје.
Од вкупно 65 смртни случаи, четири се потврдени меѓу лабораториски докажани случаи, соопшти Африка ЦДЦ.
Дополнителни сомнителни случаи се пријавени и во провинцискиот главен град Бунија, а лабораториската потврда сè уште се чека.
Владата на ДР Конго сè уште официјално не прогласила епидемија. Еден службеник изјавил за Би-Би-Си дека се очекува прес-конференција подоцна во текот на денот.
Провинцијата Итури е под воена управа од 2021 година, откако цивилната власт беше заменета со воен генерал во обид да се неутрализираат десетици вооружени групи кои со години дејствуваат во регионот. Меѓу нив е и групата Алијанса на демократски сили (АДФ), поврзана со Исламската држава.
Во последните 50 години околу 50.000 луѓе починале од вирусот во различни африкански земји.
Најсмртоносната епидемија во ДР Конго беше меѓу 2018 и 2020 година, кога починаа речиси 2.300 луѓе.
Минатата година 45 лица починаа по појава на епидемија во централната провинција Касај.