Бугарија од денеска 1. јануари 2026 година ја усвои еврото како своја валута, што претставува важна пресвртница за земјата, за историјата на еврото и за ЕУ како целина.
Ова следи по период на интензивни подготовки и напори од страна на Бугарија за исполнување на сите потребни барања, соопшти денес Европската комисија.
Еврото ќе донесе практични придобивки за бугарските граѓани и бизниси. Ќе го олесни патувањето и живеењето во странство, ќе ја зголеми транспарентноста и конкурентноста на пазарот и ќе ја олесни трговијата. Банкнотите и монетите во еврото, исто така, ќе станат опиплив симбол на слободите, придобивките и можностите што ЕУ им ги нуди на своите граѓани за сите Бугари.
Комисијата целосно ја поддржа Бугарија во нејзиниот процес на приклучување кон еврото. Со пристапувањето на Бугарија, 21 земја-членка на ЕУ и повеќе од 357 милиони граѓани на ЕУ ќе ја делат единствената валута на ЕУ. Јавната поддршка за еврото во ЕУ и еврозоната останува многу силна, при што големо мнозинство граѓани на ЕУ веруваат дека еврото е добра работа за ЕУ како целина и за нивната земја, како што покажува најновиот Евробарометар.
Урсула фон дер Лајен, претседателка на Европската комисија, изјави: „Бугарија се приклучува кон еврозоната, што е едно од најголемите достигнувања на Европската Унија. Оваа пресвртница одразува години напорна работа и посветеност, надминување на предизвиците. Еврото ќе им донесе придобивки на бугарскиот народ, олеснувајќи ги плаќањата и патувањата. Ќе донесе нови можности на бугарските бизниси, овозможувајќи им подобро да имаат корист од нашиот заеднички единствен пазар. Дополнително ќе го зајакне гласот на Бугарија во Европа. Овој чекор е добар за Бугарија и ја зајакнува Европа како целина. Ја прави нашата економија поотпорна и поконкурентна на глобално ниво. Честитки, Бугарија! Можеш да бидеш горда на она што си го постигнала.“