Составот на кабинетот засега останува непроменет. Ова пред новинарите го изјави премиерот во оставка Кирил Петков, откако на оваа тема разговараа со неговите колеги од „Продолжуваме со промената“.
Сепак, тој не сакаше да именува конкретни имиња за министри, поточно кои ќе ги заменат оние од „Има таков народ“.
„Сите ние сме многу здружена екипа и продолжуваме во истиот формат“, изјави Кирил Петков.
Премиерот во оставка повтори дека нема да преговара со Бојко Борисов, Дељан Пеевски, Костадин Костадинов и Слави Трифонов.
„Тошко Јорданов не може да направи ниту еден чекор без дозвола на Трифонов. Така и ние нема да можеме да разговараме со него, туку тоа ќе го правиме со сите други. Нема смисла бугарското општество да влезе во друга агонија ако зад сцената сè уште можат да ги контролираат средствата што треба да одат за народот, а не за неколку фирми. Време е Бугарија да ја добие можноста да имаме слободна влада која работи за народот“, додаде Петков.
Од него беше побарано да го коментира и прашањето за извозот на оружје во Украина.
„Не сме имале директен извоз на никаков начин од Бугарија во Украина, не знам за какви документи станува збор. Имаме извоз во нашите традиционални партнери, земјите од ЕУ, но нема директен трансфер Бугарија-Украина“, беше категоричен тој.