Окружниот судија Алисон Бароуз денес издаде привремена забрана со која го блокира планот на администрацијата на Доналд Трамп да му забрани на Универзитетот Харвард да прима меѓународни студенти.
Пресудата дојде откако Харвард поднесе тужба во најновата ескалација на спорот меѓу Белата куќа и една од најпрестижните американски институции, објави Би-Би-Си.
Администрацијата на Трамп тврди дека Харвард не направил доволно за борба против антисемитизмот и за промена на практиките за вработување и прием, што универзитетот силно го негираше во тужбата.
Привремената забрана беше издадена со кратка пресуда објавена во петокот, а наредбата ја суспендира одлуката донесена од Министерството за внатрешна безбедност во четвртокот за прекинување на пристапот на Харвард до Програмата за студенти и посетители на размена.
На Харвард има околу 6.800 меѓународни студенти, што претставува повеќе од 27 проценти од запишаните студенти оваа година.
„Со еден потег на пенкалото, владата се обиде да избрише една четвртина од студентското тело на Харвард, односно сите странски студенти кои значително придонесуваат за Универзитетот и неговата мисија“, се наведува во тужбата на Харвард.
Заменик-портпаролката на Белата куќа, Абигејл Џексон, реагирајќи на одлуката на судот, нагласи дека Харвард немаше да се најде во оваа ситуација доколку се грижеа за ставање крај на неволјата од антиамерикански, антисемитски и терористички агитатори на нивниот кампус.
„Харвард треба да троши време и ресурси за создавање безбедна средина на кампусот, наместо да поднесува несериозни тужби“, рече Џексон.