Утринава јавен обвинител од ОЈО Струмица го започна увидот за можните причини за пожарот во Трговскиот центар „Глобал“, кој избувнал во саботата во делот каде се врши доставување на стока и брзо се проширил.
Увидот се врши од страна на надлежниот јавен обвинител увидот во координација со увидна екипа од крим техника при МВР и СВР Струмица, а обвинителството повика и вешти лица за пожари и експлозиви, како и за електрика со цел утврдување на причините за настанатиот пожар.
Повикани се и вешти лица од областа на градежништвото и архитектурата, како и од материјално финансиско работење со цел утврдување на видот и висината на настанатата штета.
Јавниот обвинител издаде наредба за подигање на траги од лице место и нивно натамошно вештачење, како и за одземање на видео записи, односно ресивери од видео камери поставени во трговскиот центар.
Издадени се и наредби за вршење на оперативни проверки и прибирање на информации од лица кои имаат сознанија во врска со настанување на пожарот.
Во пожарот била опожарена една третина од Градскиот пазар, повеќе продавници на приземјето и првиот кат, како и дел од вториот.