Новата систематизација на полицијата предизвика политички реакции, особено во врска со Одделението за внатрешни работи во Дебар. Заменик-министерот Астрит Исени изјави дека промените важат за целата територија на Македонија и имаат за цел подобрување на организацијата и достоинството на полициските службеници.
Во однос на реакциите за именувањето на началникот на Граничната полиција со седиште во Охрид, кој ги покрива и Струга, Кичево и Дебар, Исени нагласи дека проблемите произлегле од недостиг на соодветен кандидат. Тој додаде дека со новата систематизација ќе се настојува оваа позиција повторно да им припадне на Албанците.
„Ова нема врска со Албанците. Систематизацијата го опфаќа целиот територијален опфат на РСМ, не е вклучен само Дебар. Со оваа нова систематизација, надлежностите преминуваат во полициската станица во Охрид, но вклучени се и сите други полициски станици. Намерата е сосема поинаква – со новата систематизација да се подигне достоинството на полициските службеници. Ова се случи приближно пред 8–9 месеци. Нормално, поради неможност да се најде албански претставник во тој сектор, се договоривме, во комбинација со таа позиција, да добиеме други позиции, па можеби сме добиле други функции, како што се други сектори.“, порача Астрит Исени.
Реагираа и од огранокот на ДУИ во Дебар, од каде инсистираат дека со процесот на новата систематизација во Министерството за внатрешни работи ќе се изгубат клучни функции, како што се: началник на полицијата, началник на Одделот за борба против криминал, заменик-командант и командант на граничниот премин, а одлучувањето ќе премине под јурисдикција на Секторот за внатрешни работи во Охрид.
„Дебар е граничен регион со стратешко значење и бара целосно институционално присуство и функционални одлучувачки капацитети во областа на безбедноста. Секоја одлука што може да значи слабеење на локалните структури или пренос на надлежности мора да се разгледа со максимална внимателност и врз професионални основи.“, велат од ДУИ
Од ДУИ велат дека секоја промена што ја засега структурата и функционирањето на локалната полиција директно влијае врз безбедноста на граѓаните, ефикасноста на услугите и чувството на институционална еднаквост кај граѓаните на Дебар.