50 милијарди денари е буџетот за 1.820.000 осигурени лица во Фондот за здравствено осигурување. Во споредба со минатата година, тоа е за 7 милијарди повеќе.
Но, според директорот на Фондот, Сашо Клековски, само половина од нив придонесуваат во фондот преку плати, додека останатите се на различни основи, како пензионери и социјални случаи.
„Мислам дека најмногу станува збор за нашите граѓани кои живеат во дијаспората, но не се одјавени од Македонија и продолжуваат да имаат здравствено осигурување. Исто така, мислам дека поголемиот дел од тие што не се осигурени и остваруваат приходи независно од плата, и не ја исклучувам можноста дека има и лажно осигурени лица.“, додаде Сашо Клековски.
Ова беше истакнато на прес-конференција на која двајцата директори на Фондот пред новинарите открија дека најголемиот дел од буџетот бил потрошен за пациентите на онкологија и хематологија. Директорот Клековски дополнително нагласи дека минатата година се зголемил и бројот на издадени рецепти за еден милион повеќе, а годинава оваа бројка сè уште расте.
„Целта е за сите овие скапи терапии, биолошки терапии, до крајот на годината да нема листа на чекање, односно сите пациенти да ги добијат неопходните лекови, затоа што овие скапи лекарства претставуваат голем товар за буџетот на Фондот за здравствено осигурување.“, вели Сашо Клековски.
Директорите информираа дека се издвоени и 6 милиони денари за радиолошка опрема, односно за магнетни резонанци, кои се една од слабите точки на здравствениот систем. Ова значи дека многу медицински прегледи не може да се реализираат поради долгите чекања за магнетна резонанца.
Посочија и дека просечното зголемување на платите во здравствениот сектор изнесува 17%, како мотивација за здравствените работници.