Вчера во населбата Визбегово, на нива засадена со пченица, избувна пожар.
Во близина на нивата се наоѓа хотел, а пожарот ја зафати оградата на базенот таму.
Изгореа неколку дрвја и столици. Сопственикот Баки Зеќири рече за ТВ21 дека се сомнева дека пожарот започнал поради горење на дива депонија неколку стотици метри подалеку.
„Интервениравме, за среќа имавме многу луѓе и посетителите на базенот кои исто така во поголем дел ни помогнаа. Имавме доволно опрема за хидранти“, вели Зеќири.
Зеќири упати критики и за начинот на кој противпожарните служби интервенираа.
„Повеќе од 30 минути првиот тим дојде, а вториот тим што е многу интересно, дојде по еден и пол час со два камиони, еден камион полуполн со вода, а другиот камион дојде празен.“, изјави Зеќири.
Од ЦУК вчера информираа дека Противпожарната бригада на Град Скопје интервенирала два пати, по што ЦУК испрати ново барање за итни мерки – вклучувајќи надзор, покривање на запалив материјал и забрана за понатамошно фрлање отпадоци.
„Проблемот со оваа нелегална депонија трае долго време и претставува реална закана за здравјето, безбедноста и благосостојбата на граѓаните, како и сериозен оперативен товар за Противпожарната бригада која често е ангажирана на истото место.“, изјавија од ЦУК.
Пожарот сега е локализиран и не претставува опасност, велат од ЦУК, но повикуваат на итно преземање конкретни чекори од надлежните институции за конечно решавање на проблемот со дивите депонии кои претставуваат непосредна опасност за животната средина и јавното здравје. Тие додадоа дека и минатата недела Противпожарната бригада на Град Скопје повеќепати интервенирала за гаснење на дивата депонија што горела на истото место.