Канаѓаните се соочуваат со „најголемата криза“ во својот живот, предупреди канадскиот премиер Марк Карни за време на предизборната дебата во Монтреал, која се водеше на англиски јазик. Карни, кој ја презеде функцијата премиер од Џастин Трудо пред нешто повеќе од еден месец, вети дека ќе ја намали бирократијата што ја отежнува домашната трговија за канадските компании.
Канада долго време има трговски бариери меѓу провинциите, но Карни рече дека ќе се обиде да спроведе слободна трговија во 10-те провинции и три канадски територии до 1 јули, доколку победи на изборите на 28 април, пишува Скај Њуз.
Доколку победи, планира веднаш да започне трговски преговори со администрацијата на Трамп. Тој нагласи дека ситуацијата е сериозна.
„Се соочуваме со најголемата криза во нашите животи“, рече тој во завршниот говор.
„Доналд Трамп се обидува суштински да ја промени светската економија, трговскиот систем, но тој всушност се обидува да нѐ скрши за да можат САД да нѐ поседуваат. Тие ја сакаат нашата земја, ги сакаат нашите ресурси, ја сакаат нашата вода, ја сакаат нашата држава“, посочи тој.
„Подготвен сум и управував со кризи низ годините. Ќе возвратиме со контратарифи и ќе ги заштитиме нашите работници“, додаде тој.