Претседателката Гордана Сиљановска-Давкова учествува на осмиот Самит на Европската политичка заедница, кој се одржува во Ереван, Ерменија, под мотото „Градејќи иднина: единство и стабилност во Европа“. Македонија е меѓу поканетите земји на овој форум, заедно со членките на Европската Унија, државите од Западен Балкан, Обединетото Кралство, Украина, Турција и други европски партнери.
Во рамки на престојот во Ереван, Сиљановска-Давкова оствари средба со ерменскиот претседател Вахан Хачатурјан. На средбата двајцата изразиле подготвеност за продлабочување на билатералните односи и унапредување на соработката меѓу Македонија и Ерменија. Притоа било посочено дека воведување на визни олеснувања и воспоставување директни авионски линии би можеле да придонесат за зголемена економска соработка и трговска размена, која засега е на ниско ниво.
Претседателката Сиљановска-Давкова треба да учествува и на тркалезната маса на тема „Зајакнување на поврзаноста и економската безбедност во контекст на зелената транзиција“. Дискусијата ќе ја водат хрватскиот премиер Андреј Пленковиќ и норвешкиот премиер Јонас Гар Стoре, а на неа е предвидено учество на премиери, европски претставници, генералниот секретар на ОБСЕ и претседателката на Европската комисија.
Европската политичка заедница е форум формиран за политички дијалог и координација меѓу европските држави, без разлика дали се членки на Европската Унија или не. На самитот во Ереван главни теми се демократската отпорност, поврзаноста, економската и енергетската безбедност, во услови на засилени геополитички тензии и предизвици за европската безбедносна архитектура.
Самитот има и пошироко регионално значење, бидејќи се одржува непосредно пред првиот билатерален самит меѓу Европската Унија и Ерменија, кој исто така ќе се одржи во Ереван. На тој состанок се очекува фокусот да биде ставен на продлабочување на соработката во областите на енергетската, транспортната и дигиталната поврзаност, како и на прашањата поврзани со мирот, безбедноста и стабилноста во Јужен Кавказ.
За Македонија, учеството на вакви формати е значајно бидејќи Европската политичка заедница останува една од ретките платформи каде земјите од Западен Балкан седат на иста маса со европските лидери и со држави кои имаат влијание врз безбедносната, енергетската и економската агенда на континентот. Во период на забавена европска интеграција, ваквите форуми се сметаат за важни за одржување на политичката присутност и дипломатската видливост на земјата.