Во раните утрински часови денеска, областа Кампи Флегреи во близина на Неапол беше погодена од земјотрес со јачина од 4,4 степени според Рихтер. Италијанскиот Национален институт за геофизика и вулканологија (INGV) соопшти дека епицентарот бил во заливот Пацуоли, на длабочина од околу три километри, пренесува Euronews.
Потресот бил силно почувствуван низ целиот Неапол и околината, при што многу жители во паника споделувале сведоштва на социјалните мрежи. Според првичните информации, нема пријави за повредени или материјална штета. Како мерка на претпазливост, локалните власти во Пацуоли, Баколи и Куарто одлучиле училиштата да останат затворени во текот на денот.
Кампи Флегреи, познати и како Флегрејски полиња, претставуваат голем супервулкан западно од Неапол. Станува збор за калдера – вдлабната геолошка формација создадена со уривање на древна магматска комора.
Областа е една од најсеизмички активните во Италија и е под влијание на брадизеизам – природен процес на подигнување и спуштање на тлото, кој често е проследен со серија послаби и умерени земјотреси.
Бидејќи потресите се плитки и се случуваат во горните слоеви на земјината кора, тие се чувствуваат многу силно од локалното население, дури и кога нивната јачина не е висока.