Заменик претседателот на Владата задолжен за европски прашања Никола Димитров денеска имаше средба со шефот на Мисијата на ОБСЕ во Северна Македонија, амбасадорот Клеменс Која, на која разговараа за тековните состојби и приоритетите во процесот на демократизација и европеизација на македонското општество. Посебен фокус беше ставен на областите каде ОБСЕ активно и во континуитет обезбедува поддршка како што се изборната реформа, обуките за полициските службеници, реформите во правосудството, итн.
Вицепремиерот Димитров ја нагласи важноста од активно учество во меѓународните и регионалните механизми на соработка заради обезбедување на глобалната сигурност и стабилност, што пак придонесува за унапредување на демократските процеси и зацврстување на владеењето на правото. Во таа насока, ја подвлече улогата на Мисијата на ОБСЕ во Северна Македонија во клучните области кои што се од значење за процесот на интеграција во ЕУ, како што се владеењето на правото, доброто владеење и демократското управување. Во овој контекст соговорниците се согласија дека почетокот на пристапните преговори ќе го обезбеди неопходниот импулс за спроведување на реформите во земјата.
Димитров: „Препораките на ОБСЕ/ОДИХР и наодите од изборниот и судскиот мониторинг се важни одредници за европските стандарди во поглавјата од владеењето на правото што го одредуваат напредокот во сите останати области, а придонесуваат и за зголемување на довербата на граѓаните во институциите, што за нас како Влада е најважниот индикатор за успешноста на јавните политики.“
Соговорниците разменија мислења околу спроведувањето на активностите „Агенда: Европа дома“ со која се опфатени измените на изборното законодавство, борбата против корупција и слободата на изразување, како главни програмски области на Мисијата. Амбасадорот Која посочи дека „Агенда: Европа дома“ е одличен механизам за насочување на реформите и задржување на фокусот на нашите приоритети.