Генералниот директор на Светската здравствена организација (СЗО), Тедрос Аданом Гебрејесус, предупреди дека екстремно високите температури можеби се одговорни за стотици дополнителни смртни случаи во Европа.
„Од 21 јуни се регистрирани повеќе од 1.300 дополнителни смртни случаи поврзани со високите температури во Европа“, напиша Тедрос на социјалната мрежа X.
„Европа е континентот кој се затоплува најбрзо во светот, со темпо двојно поголемо од глобалниот просек. Во моментов, околу 150 милиони луѓе живеат под влијание на екстремни горештини – стотици ги загубија животите, училиштата се затворени, а електроенергетските мрежи се преоптоварени“, додаде тој.
Во текот на изминатиот викенд, во неколку европски земји, меѓу кои Германија, Полска и Чешка, беа соборени температурни рекорди, при што температурите достигнаа или надминаа 40 Целзиусови степени.
Чешките власти ги повикаа граѓаните да избегнуваат физички активности и издадоа предупредувања за смог во централните и северните делови на земјата поради високите концентрации на озон во приземните слоеви на атмосферата, предизвикани од жештините.
Во Германија беше намален железничкиот сообраќај на една од главните линии во западната покраина Северна Рајна-Вестфалија, додека во источниот град Лајпциг беше прекинат трамвајскиот сообраќај.
Берлинската полиција користеше водени топови за да им помогне на жителите на главниот град да се разладат.
Според локалните медиуми, голем број луѓе останале во своите домови и избегнувале излегување надвор сè до зајдисонце.
Француската компанија за дистрибуција на електрична енергија „Енедис“ во неделата попладне соопшти дека околу 36.000 домаќинства во северниот и централниот дел на Франција останале без струја.
Владата на Унгарија соопшти дека нуклеарната централа „Пакс“ го намалила производството во неделата поради високата температура на водата во реката Дунав, која се користи за ладење на реакторите.
Екстремниот топлотен бран ја зафати Европа
Тедрос истакна дека топлотниот стрес често се нарекува „тивок убиец“, додавајќи дека домовите, работните места и училиштата во Европа не се изградени за да издржат вакви екстремни температури.
„Поттикнат од климатските промени и глобалното затоплување, феноменот на топлотни бранови, кој некогаш се случуваше еднаш во генерација, сега се повторува речиси секоја година“, рече тој.
Според агенцијата „Ројтерс“, научници оценуваат дека топлотниот бран, кој започна на 20 јуни, е најинтензивниот некогаш регистриран во Европа.