Трамп: Ако нема договор, воведуваме царини за 2-3 недели

Актуелниот американски претседател Доналд Трамп изјави дека ќе започне со воведување царини за земјите кои нема да постигнат трговски договор со САД во рок од „две до три недели“.

На прес-конференција во Овалната соба, Трамп рече дека очекува САД да направат „одлични зделки“ за време на тековните преговори.

„Ако не склучиме договор со компанија или земја, воведуваме царини“, рече Трамп.

Тој додаде дека неговата администрација досега разговарала со 90 земји за трговски договори.

„Ќе се случи, би рекол, во следните неколку недели, што мислите вие? Мислам, за две до три недели. Ќе ставиме број на тоа“, рече тој.

Тримесечна пауза

На 2 април, денот што го нарече Ден на ослободувањето, Трамп објави основна царина од 10 отсто за стоки од сите земји. Но, некои региони, како што се Европската унија со царини од 20 отсто и Виетнам со тарифи од 46 отсто, би се соочиле со уште повисоки царини.

Но, на 9 април, тој најави 90-дневно одложување на тие „реципрочни“ тарифи. Тој рече дека повеќето земји ќе бидат погодени со царини од 10 проценти. Во објавата на Truth Social истиот ден, Трамп рече дека прави пауза затоа што повеќе од 75 земји се обратиле до САД да започнат преговори и ниту една не возвратила со контрамерки.

Кина, меѓутоа, не ја доби истата понуда. Сега САД имаат царина од 145 отсто за кинеските производи, додека Кина возврати со царина од 125 отсто за американските производи.

Трамп уште од самиот почеток ги користеше тарифите како алатка за преговори. На 3 април, тој рече дека ќе биде подготвен да ги намали тарифите за земјите што им нудат на САД „нешто феноменално“.