Американскиот претседател Доналд Трамп го помилува основачот на најголемата светска берза за криптовалути „Бинанс“, Чангпенг Жао, познат по иницијалите ЦЗ, кој пред две години се изјасни за виновен за обвинението за перење пари додека беше извршен директор на берзата.
Трамп објасни дека ја донел одлуката по препорака на „многу почитувани поединци“ и дека верува дека Чангпенг Жао не е виновен за други обвиненија, и додаде дека помилувањето не е насочено против Кина, објави CNBC.
Белата куќа соопшти дека одлуката е дел од уставните овластувања на претседателот и доаѓа по месеци активности поврзани со регулирањето на крипто-индустријата.
Во својата објава на мрежата X (порано Твитер), Жао му се заблагодари на Трамп и најави понатамошна работа за претворање на САД во глобален центар за крипто-индустријата и технологиите Web 3.
Помилувањето предизвика остри реакции од политичарите. Конгресменката Елизабет Ворен ја нарече одлуката пример за „корупција“ и потсети дека Жао претходно лобирал за негово помилување и помогнал во развојот на крипто-активности поврзани со семејството Трамп.
Во ноември 2023 година, Чангпенг Жао постигна спогодба за признавање на вина во федералниот суд во Сиетл по точка од обвинението што го товареше за непреземање мерки за спречување на перење пари преку Binance.
Врз основа на договорот, CZ беше принуден да ја напушти својата позиција како извршен директор на Binance, а берзата плати казни во вкупен износ од 4,3 милијарди долари.
Во април 2024 година, Жао беше осуден на четири месеци затвор.
Помилувањето на Трамп значи дека сите преостанати правни ефекти од неговата кривична одговорност во Соединетите Држави се формално прекинати.