Американскиот претседател Доналд Трамп ќе биде подложен на „годишен рутински медицински преглед“ во Националната воена болница „Волтер Рид“ во близина на Вашингтон во петок, објави неговата портпаролка Каролин Ливит во соопштението во среда.
Трамп (79) бил подложен на преглед во април, по што изјавил дека е во „одлична здравствена состојба“.
Белата куќа во јули објави дека Трамп, најстариот претседател некогаш избран во САД, има венска инсуфициенција, проблем што го отежнува враќањето на крвта од нозете во срцето.
Во тоа време, Каролин Ливит одговори на шпекулациите за можниот здравствен проблем на републиканскиот претседател, по објавувањето на фотографии на кои се гледаат модринки на неговата рака.
Таа рече дека тоа е резултат на „честите ракувања“ и земањето аспирин, „како дел од стандардната терапија за превенција од кардиоваскуларни заболувања“.
Доналд Трамп не пие алкохол ниту пуши, но не ја крие својата склоност кон газирани пијалоци и синџири за брза храна.
„Претседателот Трамп размислува да оди на Блискиот Исток веднаш по тој (медицински преглед)“, рече Ливит.
Трамп објави дека во текот на викендот би можел да отпатува на мировните преговори за Блискиот Исток меѓу израелските преговарачи и милитантната група Хамас, кои веќе неколку дена се одржуваат во Шарм ел Шеик, Египет.