Американскиот потпретседател Џеј Ди Венс изјави дека претседателот Доналд Трамп сè уште нема донесено одлука дали ќе поддржи можен договор со Иран, и покрај напредокот постигнат во преговорите меѓу двете земји.
Говорејќи пред новинарите во заедничката база „Ендрјус“, Венс рече дека американските и иранските преговарачи постигнале „голем напредок“, но дека сè уште остануваат отворени прашања, вклучително и ограничувањата на иранската нуклеарна програма.
„Разговараме со нив. Сметаме дека преговараат со добра волја и дека постигнуваме одреден напредок“, изјави Венс, додавајќи дека сè уште нема гаранции дека Трамп ќе го потпише договорот.
„Мислам дека е тешко да се каже точно кога или дали претседателот ќе го потпише Меморандумот за разбирање“, рече тој.
Според Венс, американската администрација се надева дека преговорите ќе продолжат во позитивна насока и дека претседателот ќе биде подготвен да го поддржи договорот, но нагласи дека сè уште ништо не е решено.
Претходно, американскиот медиум „Аксиос“ објави дека преговарачите на САД и Иран постигнале прелиминарен рамковен договор, кој би овозможил продолжување на примирјето и почеток на преговорите за иранската нуклеарна програма. Според извештајот, процесот е предвидено да трае 60 дена.
Американски извори ја потврдија содржината на извештајот, додека „Аксиос“ нагласи дека условите од договорот во голема мера се финализирани, но сè уште е потребно одобрување од политичките лидери на двете земји.
Сепак, иранската агенција „Тасним“, која е блиска до Исламската револуционерна гарда, подоцна објави дека не постои финализиран или потврден прелиминарен договор, повикувајќи се на извори блиски до иранскиот преговарачки тим.