Американскиот претседател Доналд Трамп изјави дека е подготвен да почека „неколку дена“ за одговорот на Иран на најновиот предлог од Вашингтон, насочен кон завршување на војната, но предупреди дека ситуацијата може брзо да ескалира доколку Техеран не даде „соодветни одговори“.
„Верувајте ми, ако не ги добиеме вистинските одговори, сè може да се забрза. Сите сме подготвени“, изјави Трамп пред новинарите на настан во Конектикат.
На прашањето колку долго е подготвен да чека, тој одговори: „Можат да бидат неколку дена, но сè може да се случи многу брзо“.
Претходно, во обраќање на церемонија за дипломирање во Академијата на крајбрежната стража на САД, Трамп изјави дека САД би можеле да спроведат нови напади врз Иран доколку преговорите пропаднат.
„Ги погодивме многу силно. Можеби ќе треба да ги погодиме уште посилно, но можеби и не“, рече тој, повторувајќи го ставот на неговата администрација за иранската нуклеарна програма.
„Нема да дозволиме Иран да има нуклеарно оружје. Тоа е многу едноставно“, додаде Трамп.
Овие изјави доаѓаат веднаш по соопштението на иранското Министерство за надворешни работи дека Техеран разгледува нов американски предлог, кој наводно бил доставен преку пакистански посредници.
Пакистан досега бил клучен канал за комуникација меѓу двете страни, откако ја организираше и единствената официјална рунда мировни разговори меѓу Иран и САД.
Паралелно, Иранската револуционерна гарда предупреди дека секој нов американски напад може да го прошири конфликтот „надвор од регионот“.
Од крајот на февруари, САД и Израел се во отворен конфликт со Иран и неговите сојузници, по серија воздушни напади врз ирански воени и државни цели, во кои беа елиминирани и високи функционери, меѓу нив и врховниот лидер ајатолахот Али Хамнеи.
Иран одговори со ракетни и дронски напади врз Израел, американски бази и сојузници во регионот, а беше и затворен Ормускиот теснец, што предизвика сериозни нарушувања во глобалната трговија.