Заев подготвува национален пораз, но од секој од нас зависи дали тоа ќе го промениме. Ова, пред присутните на протестот одржан пред Владата го рече претседателот на ВМРО-ДПМНЕ Христијан Мицкоски. Рече дека не смее да се дозволи Заев да ја менува историјата, туку самиот тој да стане историја.
„Заев не прави разлика помеѓу заедничка и споделена историја и тоа упорно дозволува да се провлекува помеѓу двете држави. А тоа се две различни работи. Ако имаме заедничка историја тогаш сме исти народ. А ние сме два сосема различни народи. Не смее да молчиме за асимилацијата пред нашите очи“, посочи Христијан Мицкоски.
Мицкоски упати порака и до политичарите во Бугарија пред споменикот на паднатите борци од народноослободителна борба да се извинат по примерот на Вили Брант. Рече дека во следните денови се одлучува и за македонскиот идентитет.
„Имам информација дека овој викенд се распарчува Македонија во Софија и се преговара за иднината на нашиот идентитет. Да не дозволиме и од утре внимателно да ја блокираме Македонија секој нареден ден и да не дозволиме овие луѓе да ни ја продадат верата, нацијата и кожата. Тие одамна си го продале својот ген на ѓаволот“, истакна Христијан Мицкоски.
Денешниот протест ВМРО-ДПМНЕ го започне од две локации, од пред спортската сала Борис Трајковски во Карпош и од Јане Сандански од Аеродром, од каде поради мерките од корона вирусот со автомобили тргнаа кон Владата. Сепак пред зградата на владата сите беа собрани без потребната дистанца.