Германските власти уапсија тројца странски оперативци на Хамас осомничени за планирање сериозно насилство, соопштија обвинителите денес.
Обвинителите се сомневаат дека тројцата мажи биле вклучени во набавка на огнено оружје и муниција за Хамас барем од летото оваа година, со намера да нападнат израелски или еврејски институции во Германија.
„За време на денешните апсења, пронајдено е различно оружје, вклучувајќи автоматска пушка АК-47 и неколку пиштоли, како и значителна количина муниција“, соопштија федералните обвинители во соопштението.
Тројцата беа идентификувани како Ваел Ф. М., роден во Либан, и германските државјани Абед Ал Г. и Ахмад И. Тие беа уапсени во Берлин.
Во февруари, четворица членови на Хамас беа судени во Берлин по обвинение за планирање напади врз еврејски институции низ Европа, во она што обвинителите го оценија како прво судење на член на исламистичката група во Германија.
„Дер Шпигел“ објави дека истражители од антитерористичка група ги набљудувале обвинетите како се состануваат во Берлин во среда за да предадат оружје, по што силите интервенирале и ги уапсиле.