Руските сили ги нападнаа Киев, Харков и други градови рано во среда, соопштија украинските власти, при што беа повредени неколку лица и предизвикани нови пожари и штети на енергетската инфраструктура.
Четири лица се ранети во Киев и вториот по големина град во Украина, Харков, соопштија локалните власти, според Ројтерс, чиј тим беше сведок на силна експлозија по полноќ во Киев, каде што температурите беа околу -20 степени под нулата.
Украинската престолнина е погодена од ракети и беспилотни летала пред новата рунда трилатерални разговори во Обединетите Арапски Емирати за начините за завршување на речиси четиригодишната војна.
Руските напади предизвикаа штети во пет населби во Киев, погодувајќи три станбени блокови и зграда во која се наоѓа детска градинка, изјави на Телеграм Тимур Ткаченко, началник на воената администрација на градот.
Воздушните напади беа на сила повеќе од пет часа.
Градоначалникот на Харков, Игор Терехов, извести за целните напади на руските сили врз енергетската инфраструктура, додавајќи дека претстојат тешки одлуки за да се спречи замрзнување на системот за греење.
„Целта е очигледна – да се предизвика максимална штета и градот да остане без греење за време на силниот студ“, рече Терехов на Телеграм.
Руските напади, според украинските медиуми, доведоа и до прекини на електричната енергија во два града во регионот Харков – Изјум и Балаклија, а погодени беа и две станбени згради во северниот град Суми.
Русија и Украина минатата недела се согласија привремено да ги прекинат нападите врз енергетската инфраструктура на другата страна, но не се согласија за временска рамка за прекин на ваквите напади.
Кремљ соопшти дека американскиот претседател Доналд Трамп лично го замолил рускиот претседател Владимир Путин да се воздржи од напади врз Киев до 1 февруари, додека украинскиот претседател Володимир Зеленски рече дека прекинот на нападите врз енергетските објекти треба да трае една недела, почнувајќи од 30 јануари.