Вакцините против сезонски грип се очекува да бидат обезбедени во текот на месецов, а од Министерството за здравство уверуваат дека се преземаат сите потребни активности за вакцинацијата на ранливите категории да започне што е можно поскоро.
Од Министерството објаснуваат дека доцнењето не е поврзано со домашната постапка за набавка, туку со глобален проблем во производството на вакцините. Причината е промената на сите три вирусни соеви што се користат во составот на вакцината.
Како што информираат од Министерството, годинава за првпат истовремено се променети двата соја на вирусот на грип А и еден сој на грип Б. Светската здравствена организација и американската Агенција за храна и лекови (ФДА) ги ажурирале сите три соеви, поради што производителите ширум светот подоцна го започнале производството.
На објавениот тендер за набавка во земјава не пристигнала ниту една понуда. Од Министерството велат дека причината е глобалниот проблем со производството, а не домашната постапка.
Во меѓувреме, Министерството за здравство е во постојана комуникација со земјите од регионот и со други меѓународни партнери, преку кои се очекува вакцините да бидат обезбедени во текот на овој месец.
Од Министерството потсетуваат дека вакцинацијата останува најсигурната заштита од тешки форми на грип и компликации, особено за хронично болните, постарите лица и бремените жени.
Граѓаните ќе бидат навремено информирани за сите нови информации поврзани со обезбедувањето на вакцините и почетокот на вакцинацијата.