Преговорите почнаа, но тие можат да бидат блокирани во моментот кога ќе треба да се отвори Уставот, бидејќи такви најави испрати македонската опозиција. Еврокомесарот за проширување и добрососедство, Оливер Вархеји, изјави дека уставните измени мора да се случат, бидејќи, како Владата, така и Собранието презеле одговорност да го продолжат европскиот пат. Тој ја повика македонската опозицијата да биде рационална и да работи за иднината на Македонија.
„Францускиот предлог вклучува дел од надлежностите на Собранието и затоа беше многу важно да се слушне Собранието – дали е подготвено да влезе во едно такво решение. Јасно кажа дека се подготвени на такво нешто. Се надевам дека отсега сите партии, вклучително и опозицијата, ќе работат за европската иднина и нема да почнуваат со контроверзии и предизвикување емоции кои нема да ја носат земјата напред“, вели Оливер Вархеји.
Од друга страна, премиерот Ковачевски, на став дека е одговорност на секој политичар да размислува на иднината на новите генерации и на земјава, затоа, како што вели пратениците во Собрание треба да гласаат „за“ уставните измени.
Првата политичка Меѓувладина конференција се одржа денеска, а втората се очекува да се случи веднаш по усвојувањето на уставните измени кои ги бара Бугарија. Инаку, денеска и официјално почна скрининг процесот кој ќе трае две и пол години.