Во Скопје се одржа третото издание на регионалниот настан за вмрежување на млади претприемачи во организација на Унија на млади претприемачи на Македонија. Целта е бизнисите од регионот да се поврзат и да ја зајакнат претприемачката заедница. Организаторите велат дека преку директни средби, панели и брзо вмрежување треба да се поттикнат нови партнерства, инвестиции и извозни можности меѓу компаниите во сопственост на младите, односно на лица до 35 години од регионот на Западен Балкан.
„Големата цел е Балканска унија. Значи да бидеме во едно тело и да правиме поголеми промени, затоа што заедно сме посилни… Промени во законите што е клучно за младите претприемачи за да може да останат на Балканот и да не си одат од државите“, вели Ивона Трајановска, коосновач и претседател на Унија на млади претприемачи „Phoenix Rising“, Македонија.
Членки на иницијативата и на партнерските програми се Македонија, Србија, Црна Гора и од лани и Албанија, а целта е да се вклучат сите земји од Западен Балкан.
„Планираме да ги вклучиме сите шест земји од Западен Балкан бидејќи иницијалната идеја беше таа. Почнавме со Црна Гора, Србија, Македонија и таа соработка трае веќе неколку години. Сега го помагаме основањето на организација на млади претприемачи во Босна и Херцеговина и Косово, додека Албанија од претходната година се вклучи и со неа соработуваме, можам да кажам доста убаво во последнава година.“, рече Урош Булатовиќ, основач и претседател на Унијата на млади претприемачи на Црна Гора.
Организаторите најавуваат дека целта е во 2026 година да се одржи и Саем на млади претприемачи, како следен чекор за поврзување на бизнисите и пристап до инвеститори.