Годинава имало нови 38 регистрирани лица со ХИВ/СИДА во Македонија. Податоците се заклучно со 27 ноември, објави Институтот за јавно здравје по повод 1. декември, Светскиот ден за борба против СИДА.
Ова претставува инциденца од 2,1 на 100.000 жители, објавува ИЈЗ. За споредба инциденцата во земјите на ЕУ во 2024 година била 5,3 на 100.000 жители.
Бројот на случаи во 2025 година е помал за 25,5% споредено со истиот период од лани.
Најголем дел од случаите се од Скопје (15). Останатите случаи се регистрираат како спорадични случаи во 14 градови, додека еден е случај со странски државјанин.
Од 38 регистрирани, 37 се лица од машки пол, додека едно е од женски пол. Возраста не отстапува значително од возрасната дистрибуција од претходно пријавените случаи. Просечната возраст на новите случаи е 35 години, а е во опсег од 23 до 64 година, а 73,7 отсто од случаите се на возраст од 20 до 39 години. Оваа година, според податоците на Институтот се регистрирани осум смртни случаи поврзани со СИДА.
ИЈЗ нагласува дека Македонија е земја со ниска преваленца на ХИВ, од 1987 до 2025 се регистрирани 726 случаи на ХИВ/СИДА, но во последните години се бележи нагорен тренд, 32 отсто од сите случаи се регистрирани во последните пет години.