Верници и светски лидери се собираат на сончевиот плоштад „Свети Петар“ за да му оддадат последна почит на Франциск, додека папата го започнува своето последно патување од Ватикан до неговото избрано почивалиште – едноставен гроб во неговата сакана црква во Рим.
Властите очекуваат 200.000 луѓе на погребната миса на плоштадот „Свети Петар“ во Ватикан, која ќе започне во 10 часот наутро кога ковчегот ќе биде изнесен на плоштадот пред базиликата.
Некои кампувале преку ноќ за да се обидат да обезбедат подобри места на плоштадот.
„Чекавме цела ноќ. Да го следиме (Франциск) во неговите последни моменти е многу емотивно.“, рече шпанската поклоница Марија Фиеро.
„Бев будна цела ноќ“
Џејмс Мери, францисканска калуѓерка, исто така чекаше преку ноќ. „Бев будна цела ноќ“, рече таа. „Сакаме да се збогуваме затоа што тој (беше) жив светец, многу скромен и едноставен.“
Поворката покрај ковчегот на папата Франциск во базиликата „Свети Петар“ заврши во петокот вечерта по три дена, а Црквата проценува дека 250.000 ожалостени му оддадоа почит на папата, кој почина во понеделник на 88-годишна возраст.
Базиликата „Свети Петар“ ги затвори вратите во 19 часот. Непосредно пред тоа, францускиот претседател Емануел Макрон и неговата сопруга Брижит пристигнаа да се помолат покрај ковчегот.
Трамп и Меланија пристигнаа
Претседателот на САД, Доналд Трамп, и неговата сопруга Меланија, исто така, пристигнаа во Рим, а на погребот ќе присуствуваат 162 официјални делегации, вклучувајќи неколку католички суверени, италијанското раководство, британскиот премиер Кир Стармер и британскиот престолонаследник Вилијам, украинскиот претседател Володимир Зеленски, аргентинскиот претседател Хавиер Миеле, бразилскиот Луиз Инасио Лула да Силва и генералниот секретар на ОН Антонио Гутереш.
Македонија е претставена од претседателката Гордана Сиљановска Давкова.
Пристигнувањето на толку голем број светски лидери доведе до голема безбедносна сила составена од полиција, војска и други служби. Снајперисти, кучиња трагачи и тимови за деактивирање бомби, специјални сили на реката Тибар и други единици ќе бидат распоредени за да се осигура дека сè ќе тече непречено.
Италијанскиот кардинал Џовани Батиста Ре ќе ја предводи погребната миса. На погребот ќе присуствуваат повеќе од 220 кардинали, вклучувајќи ги и оние кои имаат право да гласаат на претстојната конклава за избор на следниот папа.
По мисата, ковчегот на папата ќе биде вратен во базиликата „Свети Петар“, од каде што ќе тргне поворка за погреб во базиликата „Санта Марија Маџоре“.
Десетици илјади луѓе ќе се соберат на рута долга неколку километри низ центарот на Рим – минувајќи покрај знаменитости како што се Пјаца Венеција и Колосеумот до базиликата каде што Франциск ќе биде погребан откако ја често посетувал за време на неговото 12-годишно папство.
Франциск ќе биде првиот папа кој нема да биде погребан во базиликата „Свети Петар“ по повеќе од еден век.
Самиот погреб ќе биде приватен со неколку кардинали, блиски соработници на Франциск и неговата лична медицинска сестра. Ковчегот на папата ќе биде пречекан од некои сиромашни и бездомници во базиликата, како што посакуваше папата.