„За уставните измени не се ни дискутира!“ – Кои ресори ќе ги бара Вреди од ВМРО?

Основен услов во преговорите се уставните измени. За ова не се разговара без разлика дали европскиот фронт или коалицијата ВРЕДИ преговара со ВМРО. Вака изјавија двајцата гости во Дејли клик, Арбен Зибери од Европскиот фронт и Фари Хисени од коалицијата ВРЕДИ. Но, освен за уставните измени, при преговорите на работните тела ќе се разговара и за поделба на ресорите. Од ВРЕДИ велат дека не ги интересираат позиции туку институции.

„Постојано велевме дека не не интересираат позиции како име, туку институции. Не ни треба министерот, туку ни треба министерството. Спикерот не ни треба, туку Собранието. Премиерот не ни треба, туку Владата“, вели Фари Хисени.

И за таа цел од денеска ќе почнат преговорите меѓу работните групи и ќе се дефинира кој со кои министерства ќе раководи.

„Денеска почнуваат работните групи меѓу двата табора, ВМРО од македонскиот табор и ВРЕДИ како единствена национална опција. Во рамките на координативното тело ќе се дефинираат бројките и кои министерства ќе ги води ВРЕДИ, кои клучни позиции ќе …“, вели Фари Хисени.

-Дали имате преференции за тоа кои министерства би ги сакале?

„Тоа не е преференција, туку она што е во корист на граѓанинот“.

Но, што може да добие Европскиот фронт повеќе од она што го бара ВРЕДИ? Арбен Зибери е убеден дека ДУИ повторно би успеала да добие онолку министри колку што води сега во актуелната влада.

„Секако, би можеле да ги заземат овие позиции бидејќи ДУИ секогаш го правела тоа што го зборувала. Наш единствен услов без кој не седнуваме да разговараме со нив. Ако кажат дека нема да гласаме за уставните измени, нема ништо повеќе“, порача Арбен Зибери.

Зибери го информирал Хисени дека коалицијата ВРЕДИ наскоро ќе зажали што соработувала со Мицкоски и наскоро ќе се откаже од Владата.

„Ние со овој начин на размислување, со ваквото однесување на партиите кои претендираат да бидат  дел од власта, запамтете дека ќе бидеме изолирани. Ќе останеме изолирана држава. Многу брзо ќе дојдете до ситуација за работите што ги правите сега со Мицкоски,  ќе го пцуете Мицкоски со тоа што ќе ве игнорира и ќе ве игнорира во Владата на ВМРО-ДПМНЕ“, вели Арбен Зибери.

Инаку, во однос на ресорите, неодамна Арбен Таравари од коалицијата ВРЕДИ изјави дека се надева дека претседателот на Собранието повторно ќе биде предводен од Албанец, а тоа ќе биде едно од барањата во текот на преговорите. Од самиот почеток, односно пред изборите, од ВРЕДИ порачаа дека нивните барања ќе бидат да раководат со институции кои се борат против криминалот и корупцијата.