Иако доби позитивна оценка од Венецијанската комисија со неколку забелешки, за предлог-законот за правична и соодветна застапеност повеќе од три месеци нема конкретни чекори за негово усвојување, а нема ниту јасен рок од Владата. Пратеникот на АА, Ријад Шаќири, вели дека процесот се одолговлекува и се карактеризира со недостиг на транспарентност, додека испраќањето во Венецијанската комисија само дополнително го одложило.
„Што се однесува до поддршката или неподдршката на овој закон, не можам да кажам без да видам што содржи законот. Второ, имам мои забелешки и резерви дека овој закон до крајот на мандатот на Владата нема да се имплементира. Реално, дури и ако се врати од Венецијанската комисија со позитивен одговор, и Владата условно има подготвеност да го имплементира, мора да бидат предвидени буџетски средства, да се направи ребаланс на буџетот, да се обезбедат средства и потоа да се спроведе законот“, порача Ријад Шаќири.
Во меѓувреме, еден од лидерите на ВЛЕН, Изет Меџити, изјави дека законот ги поминал процедурите и се очекува наскоро да биде усвоен во Собранието. Тој додаде дека и без „Балансерот“, застапеноста на Албанците достигнала рекордни нивоа благодарение на ангажманот на албанскиот политички фактор во Владата.
„Законот за застапеност ги помина сите филтри и доби оценка и од Венецијанската комисија и време е, со мало доцнење, да се врати и дефинитивно да помине во републичкиот парламент, да стане валиден закон и ова прашање да се затвори, при што ќе ја одигра својата улога за правична застапеност на Албанците во РСМ. За да ги смириме нашите граѓани, она што го кажа Народниот правобранител минатата година – иако немаше „Балансер“, албанскиот политички фактор во Владата овозможи да се постигне рекорд во застапеноста на Албанците во државните институции“, вели Изет Меџити.
Од друга страна, ДУИ обвини за прекршување на принципот на правична застапеност, истакнувајќи дека во 40-те унапредувања во Централниот регистар не бил вклучен ниту еден Албанец. Албанската опозиција, вклучително и таа на Зијадин Села, го критикуваше предлог-законот поради недостаток на казнени механизми и предупреди дека може да остане само на хартија.