Градоначалникот на Куманово Максим Димитриевски ќе треба да плати казна од 300 до 500 евра поради прекршување на решението што го добил за самоизолација. Покрај него во Скопје отишол и шефот на Општинскиот центар за управување со кризи Горан Стојановски. По извршените инспекциски проверки, директорката на Државниот санитарен и здравствен инспекторат Иринка Бухова вели дека Димитриевски го прекршил решението да се изолира дома. Иако добил упат за анализи во Клиниката за инфективни болести, но тој не се појавил таму. Со возило на брза помош заминал да прави тестови во приватни лаборатории
„Направен е прекршок непостапување по решение, односно истите го напуштаат местото на престој. Тоа казниво, за што ќе се изрече прекршочна казна по Закон за заштита на население од заразни болести. Истото изнесува парична казна од 300 до 600 евра во денарска противвредност“, изјави Иринка Бухова – директор на ДСЗИ.
Бухова вели дека и покрај негативниот резултат на приватните клиники, Димитриевски не може да биде заведен како излекуван пациент, бидејќи протоколот налага по истекот на 14-дневна изолација да се добијат два последователни негативни резултати. Инспекторите утврдиле и серија пропусти кај Кумановскиот здравствен центар.
„Брисевите се земани во просториите на општина Куманово, што е сосема спротивно од протоколите. Брисеви на лица сомнителни со индикација, епидемиолошка анкета и со појава на симптоми исклучиво се земаат во простории на овластениот центар за јавно здравје“, изјави Иринка Бухова – директор на ДСЗИ.
Го контактиравме градоначалникот Димитриевски, но рече дека се уште се консултира со правни лица и дека подоцна ќе излезе со став во врска со наодите од Здравствениот инспекторат.