БСЖ вакцините против туберкулоза се очекува да пристигнат во земјава во текот на следните неколку дена, додека имунизацијата со вакцината на бугарскиот производител „Бул Био“ привремено е одложена по пријавувањето на четири сомнителни случаи на воспаление на коските кај деца во Хрватска.
Од Институтот за јавно здравје информираат дека се проверуваат квалитетот на вакцините и можната поврзаност со овие случаи. На родителите им се советува да останат смирени и да побараат медицинска процена доколку кај децата се појават болки, оток на коските или тешкотии при движењето.
Во меѓувреме, од Министерството за здравство потсетуваат дека вакцинацијата против туберкулоза е задолжителна. Во моментов, во земјава 95 пациенти се лекуваат од оваа болест.