Алкалоид испиша историја, се пласираше во полуфинале на ЕХФ Европскиот Куп

Ракометарите на Алкалоид да испишуваат нови успеси во клупската историја, откако вечерва триумфираа над Баја Маре со 32-25 и обезбедија место во полуфиналето на ЕХФ Европскиот куп. Избраниците на Кире Лазаров одиграа зрел и дисциплиниран натпревар, започнувајќи со цврста одбрана и ефикасен напад, а потоа умешно ја одржаа стекнатата предност, претворајќи ја во историски пласман во европско полуфинале.

Минутите на почетокот беа во знакот на голманот Галевски, кој со три успешни интервенции од самиот старт ги исфрли од ритам романските ракометари. Тоа донесе брза предност од 4-0 за Алкалоид, а додека гостите уште беа во шок македонскиот тим успеа да зголеми на 8-2. Баја Маре за момент намали на четири гола разлика, но Галевски тогаш презеде и поинаква улога, па македонскиот голман со два гола од својата половина ги крена на нозе сите присутни во салата „Автокоманда“. Резултатот во првото полувреме рутински се контролираше, Алкалоид имаше најубедливи плус седум кога Ивановски погоди за 17-10, на одмор заминувајќи со шест гола предност (18-12).

Само за момент Романците стигнаа до пет гола разлика на самиот старт од второто полувреме (19-14), Алкалоид имаше одговор и во неколку ситуации „сино-белите“ имаа предност од по осум гола разлика, против немоќните гости кои немаа одговор за мотивираните момци на Кире Лазаров. Победата во ниту еден момент не беше доведена во прашање, предноста беше рутински контролирана се до самиот крај и конечните 32-25, за огромна радост на Лазаров, неговите избраници и сите присутни во салата во скопска Автокоманда.

Галевски мечот го заврши со девет успешни интервенции, а во нападот најефикасни беа Петковски со седум, пред Стојковиќ со пет и Ѓоргиев и Франциско со по четири погодоци.

Противник на тимот на Лазаров во полуфиналето ќе биде норвешкиот претставник Рунар Сандефјорд, кој денеска приреди сензација со елиминацијата на грчкиот фаворит Олимпијакос, со победата од 33-23 во Норвешка со која беше анулирана негативата од „минус шест“ од првиот натпревар во Атина.