Во земјава недостига сигнализација во сообраќајот, што го зголемува ризикот од несреќи, алармира сообраќајниот инженер Рефик Мифтари, потсетувајќи дека сообраќајните знаци се клучни за насочување на возачите.
„На некои места недостига сигнализација до 90%, било хоризонтална, било вертикална, и таму имаме многу ‘црни точки’ кога станува збор за несреќи. Имаме инвестиции, но нивниот квалитет — било квалитетот на асфалтот, било на проектите — е проблематичен. Немаме долгорочна стратегија, туку само краткорочни решенија во поглед на асфалтирањето и проектирањето.“, порача Рефик Мифтари.
Во однос на проектот „Safe City“, Мифтари вели дека законот кој го регулира го смета за неурамнотежен и нетехнички, бидејќи законите кои ги предлагаат министерствата често имаат логички несогласувања во делот на казнените мерки.
„Камерите можат да ги идентификуваат или регистрираат прекршоците, но не можат да ја заменат сообраќајната сигнализација. Сообраќајните знаци се клучни за предупредување и насочување на возачите — доколку тие недостасуваат, безбедноста на патиштата е сериозно доведена во прашање, без оглед на присуството на технологијата. Ако навистина сакаме да изградиме безбеден град, технологијата мора да оди рака под рака со редот, едукацијата и патната инфраструктура“, вели Рефик Мифтари.
Според Мифтари, густата сообраќајна фреквенција би се намалила со квалитетен јавен превоз. Тој додаде дека треба да се вклучат и надворешни експерти во подготовката на долгорочни проекти, а не само да се казнуваат граѓаните. Мифтари исто така предлага во училиштата да се воведат задолжителни предмети за едукација и безбедност во сообраќајот.