Пет малолетници се под кривична истрага од страна на судството во кантонот Сараево поради лажни пријави за бомби во училиштата. За еден малолетник е одредена и мерка „привремен притвор“, но заканите продолжија и денеска.
Заканите со бомби не престануваат без оглед на апсењата, но и акцентот на кривичната одговорност. Мета на пријавувачите се училиштата, градинките и Општинскиот суд. Родителите се очајни, а учениците и наставниот кадар се под голем стрес.
„Организацијата на наставата е всушност помал проблем, колку што огромен проблем е ваквата несигурност. На учениците им се оневозможува редовно образование, безбедно да доаѓаат на училиште. Значи, многу е тешко да се состави наставата. Што треба да прават родителите со своите деца? Возрасните деца можат сами да си одат дома, но што е со младите студенти? Родителите треба да направат целосна реорганизација на денот“ , објаснува Самира Нукиќ, директорка на основното училиште Мехмедалија Мак Диздар во Сараево.
На состанокот на Владата на кантонот Сараево со полицискиот комесар било констатирано дека наставниот процес во Сараево е значително загрозен. Ветена е психичка поддршка, но и можност за малолетнички затвор или воспитни мерки за пријавувачите. Од родителите ќе се бара материјална отштета за настанатата штета, и евентуална казна затвор. Максималната казна за такви кривични дела е 5 години. Се најавуваат и долгорочни институционални мерки.