Поранешниот претседател на Србија, Александар Вучиќ, се огласи откако граѓани вечерва упаднаа во редакцијата на провладиниот таблоид „Информер“ во Белград.
„Почитувани граѓани, вечерва бевме сведоци на насилство без преседан. Монструозно насилство – упад во ’Информер‘, напад врз слободата на изразување, слободата на јавниот дискурс и слободата на медиумите. Симптоматично е што никој не се осмелува да каже ни збор за тоа.
Европската Унија и сите останати молчат. Молчат и многу новинарски здруженија, како и колеги новинари – веројатно затоа што сметаат дека имаат право да ја истурат својата злоба врз Драган Вучиќевиќ. Да го направевме ние истото кон N1 или ’Нова‘ – медиуми кои изнесоа работи десет пати полоши од сè што Вучиќевиќ некогаш кажал за демонстрантите – ќе бевме етикетирани како најлоши насилници, диктатори, автократи и којзнае што уште не.
Сепак, овде станува збор за нешто многу поопасно. Драган Вучиќевиќ дури стапи во контакт и со Срдановиќ – човекот кој е прв на списокот на демонстрантите – за да го праша дали би сакал да помогне, барајќи од луѓето да си заминат. Тој одби да го стори тоа“, изјави Вучиќ во видео објавено на Инстаграм.
Како што вели, останува да се подготват за долга, тешка и болна борба.
„Со опасни и неодговорни луѓе не може да се разговара. Не може да се има работа со луѓе кои мислат дека сите треба да се плашат од нив, наместо да разговараат со луѓето. Тие длабоко грешат. Има луѓе кои веќе поминале низ сето ова во 2000 година. Ние воопшто не се плашиме од нив и ќе им се спротивставиме на секое место, чувајќи го нашиот личен и физички интегритет.
Но, ова ви покажува колку малку беше потребно: еден ден, само еден ден – и тоа во моментот кога ние ја признавме победата и им честитавме (нешто што тие го немаат направено на ниту едни избори во последните 14 години, иако губеа со разлика од милион и пол гласови).
Па така, штом завршивме и го направивме она што изгледа не го очекуваа, тие не знаат што да прават со тоа. Не знаат што да прават со сето ова. Па, ако можат некого да малтретираат – најдобриот начин за славење им е да претепаат некого и да го држат како заложник, а притоа никаде нема никаква одговорност.
Им благодарам на оние неколку чесни полицајци кои сакаа да си ја вршат работата, бидејќи повеќето денес не го сторија тоа, сакајќи да им се допаднат на новите власти. Останува, како што реков, да се подготвиме за долга, тешка и болна борба од која ќе излеземе како победници“, нагласи Вучиќ.