Лидерите на седум земји, меѓу кои и четири членки на ЕУ, го осудија големиот проект за изградба на населба на Западниот Брег и повикаа Израел да престане со проширувањето на населбите на окупираната палестинска територија, откако израелските власти објавија тендер за изградба на повеќе од 1.200 станбени единици во областа. Изјавата ја потпишаа Франција, Германија, Италија и Холандија, како и Обединетото Кралство, Норвешка и Канада.
„Во време на сериозна нестабилност на Западниот Брег, со невидено ниво на насилство од страна на доселениците врз цивили и сериозни ограничувања за палестинската економија, оваа одлука е уште позагрижувачка“, се наведува во заедничката изјава, во која Израел се повикува „веднаш да ги повлече овие планови и да престане со проширувањето на населбите на Западниот Брег“.
Планот Е1 беше одобрен од Израел минатата година и дополнително би го одвоил источен Ерусалим, кој е окупиран и анектиран од Израел и во кој мнозинството жители се Палестинци, од Западниот Брег.
Генералниот секретар на ОН, Гутереш, исто така изјави дека планот Е1 претставува „егзистенцијална закана“ за создавањето поврзана палестинска држава.
И белгискиот министер за надворешни работи Максим Прево ги нарече тендерите „неприфатливи“, оценувајќи дека проектот „сериозно би ја поткопал одржливоста на решението со две држави“. Оваа осуда беше поддржана и во изјавата на шефот на британскиот Форин офис, Ед Милибанд, кој побара запирање на проектот. Лондон поради ова го повика и израелскиот вршител на должноста амбасадор. Милибанд изјави дека пораката директно му ја пренел на својот израелски колега Гидеон Саар.
Саар во четвртокот изјави дека „категорично“ ја отфрла изјавата на Милибанд и „покровителскиот тон на неговите зборови“ „Еврејскиот народ има право да живее низ целата Земја Израелска, исто како што Британците имаат право да живеат во Лондон и низ целото Обединето Кралство“, напиша тој на X.
Саар продолжи обвинувајќи го Обединетото Кралство дека „ја обвинува само Израел, додека го игнорира палестинскиот екстремизам“, за кој, според него, се поттикнуваат антисемитските напади врз британската еврејска заедница.„Одлуката на британската влада да ги наруши односите меѓу нашите земји е длабоко несреќна“, додаде тој, ветувајќи дека „Израел ќе ги брани своите права, своите интереси и својот народ“.
Израел ги одобри плановите за парцелата со површина од околу 12 квадратни километри, позната како Е1, источно од Ерусалим, во август минатата година. Со планот се предвидува изградба на околу 3.400 станбени единици на ова исклучително чувствително подрачје, кое се наоѓа меѓу Ерусалим и израелската населба Маале Адумим. Најновиот тендер опфаќа повеќе од 1.200 станбени единици, според израелската невладина организација „Мир сега“ (Peace Now).