Од Демократската Унија за интеграција бараат појаснување од Владата, бидејќи тврдат дека во близина на гробиштата во Блаце се гради објект, за кој тврдат дека е во сопственост на компанија за коцкање. ДУИ исто така прашува зошто е повлечен законот со кој извршната власт вети дека ќе го отстрани коцкањето од околината на училиштата.
„Доколку се потврди дека таму се гради објект за коцкарски активности, тогаш се работи за една од најнеодговорните одлуки и најнавредлива за чувствата на граѓаните. Гробиштата не се место за казино.
Гробиштата не се простор за коцкарница. Гробиштата не се простор за комерцијална добивка. Затоа, веднаш бараме: Да се објави вистинската намена на објектот и целата релевантна документација. Да се запрат работите додека случајот не се целосно расветли. Да се испита како е дозволена таква активност во близина на гробиштата. Да се почитува волјата и чувствителноста на граѓаните од ова подрачје. И конечно, како неопходен додаток: граѓаните имаат право да знаат зошто оваа влада го повлече и законот со кој вети дека ќе го отстрани коцкањето од околината на училиштата“, велат од ДУИ.
На овие критики вратија од ВЛЕН. Од Коалицијата велат дека „ДУИ се заглавува во сопственот колосек“.
„ДУИ, хранета и одржувана со години од игрите на среќа и казината, денес се обидува да манипулира со теми што самата ги произведувала со години. Иронијата е брутална. Тие што со години ја претворија индустријата на игрите на среќа во политичка каса, денес глумат лудило. Апсурд кој не држи вода.
Вистината е едноставна. Кога ДУИ зборува за казина, од позадина зборува црната кутија на Артан Груби. Таа кутија со години го држеше овој сектор под контрола преку неговата десна рака, бегалецот Прпарим Бајрами, го лиценцираше, го управуваше и го претвори во механизам за политичко влијание, уцени и тесни интереси. Денес ДУИ не открива проблем, туку се сопнува од сопствените траги.
Ако ДУИ сака да зборува за лиценци, адресата им е добро позната. Нека ја побараат кај Артан Груби и кај сопствената политичка архива, таму каде што со години се цртала коцкарската мапа на државата.
Црната кутија на Артан Груби не е затворена. Таа допрва ќе зборува. А кога ќе прозбори, ќе стане јасно кој, меѓу другото, ја изгради и коцкарската империја“, велат од ВЛЕН.