Албанската опозиција продолжува да го бара празното место во Државната изборна комисија. Пратеникот на Движењето Беса, Фадиљ Зендели, го повикува новиот претседател на Собранието, Јован Митрески, да ѝ наложи на Комисијата за прашања на изборите и именувањата да го предложи кандидатот на албанската опозиција, Абдуш Демири за член на ДИК. Зендели го потсетува Митрески дека другиот кандидат, Зуљфи Адили е предложен од партија која не учествувала на последните избори.
Од албанската опозиција велат дека доколку Митрески продолжи да го блокира овој процес, тогаш ќе се докаже дека ДУИ и СДСМ се обидуваат да ја осакатат ДИК за да ги фалсификуваат изборите.
Првиот човек на ДИК пак, Александар Даштевски вели дека седмиот член е добредојден во составот на комисијата, но додава дека и во случај да не се избере во Собрание, тие можат да функционираат и со 6 члена.
Од албанската опозиција порачуваат дека кандидатот предложен од EДП е нелегитимен, поради тоа што партијата не излегла на избори и е партија која, како што вели Зендели е дел од власта и наградена со директорски места. Доколку во наредните денови не ја постигнат целта, ЕСП ќе продолжи да ја бојкотира работата на законодавниот дом.