Денеска се комплетираа натпреварите по групи на ЕУРО 2020, со што ги добивме сите осминафилисти.
Последни патници таму се селекциите на Шпанија, Шведска, Франција, Германија и Португалија.
Во „групата на смртта“, Португалија и Франција одиграа нерешено 2:2 во интересен и возбудлив натпревар, со што и двете селекции обезбедија место меѓу најдобрите 16 репрезентации. Роналдо од пенал ја донесе Португалија во водство, а израмни Бензема исто така од пенал за 1:1 на полувремето. Франција направи пресврт со голот на Бензема, а потоа Роналдо одново од пенал донесе „реми“.
Далеку поинтересно беше во Минхен, каде што Германија буквално се „протна“ во 1/8 финалето, откако Унгарија на два пати имаше водство. Во 11. минута Шалаи ги однесе Унгарците во водство, а потоа израмни Хаверц во 66. минута. Само што тргна од центарот, Унгарија повторно поведе преку Шефер. И Унгарците имаа 1/8 финале се до 84. минута кога Горецка со помош на среќата успеа да израмни, и да и донесе на Германија второ место во групата.
Во групата „Е“, Шпанија ја „растури“ Словачка со 5:0, и отиде во 1/8 финалето, но како второпласирана селекција, затоа што Шведска во вториот дуел ја совлада Полска со 2:1. Шпанците, конечно, покажаа реализација иако утнаа и пенал во првиот дел.