Данска против Англија вечерва на Вембли ќе се сретнат во второто полуфинале на годинашното ЕУРО 2020 година, кое ќе биде историско и за Македонија, со учеството на истото за првпат на нашата репрезентација.
Англичаните важат за големи фаворити, со оглед дека и натаму немаат примено ниту еден гол на првенството, а на импресивен начин со победата од 4:0 над Украина стигнаа до оваа фаза. Згора на тоа играат на домашен терен на „Вембли“, а Данците ќе ја немаат поддршката од трибините.
Англија атакува на својот прв трофеј на Европските првенства, а сега, се чини е најголемата шанса за такво нешто.
Данска, пак, откако доживеа несакани моменти и несреќата со Кристијан Ериксен, се чини најдоа мотив да се пласираат меѓу најдобрите четири селекции. Токму преживувањето на Ериксен, и фактот дека е добро, беше „ѕвездата“ која ги водеше Данците до тука. Сега сакаат да одат и чекор понатаму – финале. Да го повторат ЕП во 1992 година кога неочекувано добија покана за учество на турнирот, и го освоија.