Европската комисија во своите препораки за Италија, кои треба да бидат објавени утре, ќе укаже на недостатокот од цврста индустриска стратегија и ќе побара мерки за поттикнување на инвестициите на капиталните пазари, како и реформи во даночниот систем.
Според документ до кој имале увид европските медиуми, Комисијата ќе ја повика Италија да усвои поамбициозна индустриска политика насочена кон намалување на регионалните разлики, модернизација на даночниот систем и зајакнување на капиталниот пазар. Овие препораки се дел од пошироките напори за подобрување на конкурентноста на европските економии, што е еден од главните приоритети на претседателката на Комисијата, Урсула фон дер Лајен.
Во документот се посочува дека продуктивноста во Италија останува ниска, а економските разлики меѓу северниот и јужниот дел на земјата продолжуваат да претставуваат сериозен предизвик. Како клучни проблеми се наведуваат недоволната координација меѓу индустриските, инфраструктурните и истражувачките политики, како и фрагментираните државни поттикнувања.
Иако италијанската влада претходно го претстави стратешкиот документ „Made in Italy 2030“, Европската комисија смета дека сè уште недостигаат конкретни мерки и јасна управувачка структура за спроведување на индустриската политика.
Брисел исто така препорачува поголема мобилизација на домашните заштеди, развој на капиталните пазари и поттикнување на растот и консолидацијата на компаниите, со цел да се обезбеди посилна поддршка за индустрискиот развој.
Посебен акцент е ставен и на даночниот систем. Според Комисијата, Италија премногу се потпира на оданочување на трудот, што негативно влијае врз економскиот раст и конкурентноста.
Во препораките се наведува дека дел од даночниот товар треба да се пренасочи кон други извори на приходи кои имаат помало влијание врз економската активност. Дополнително, критикуван е и рамниот даночен режим за самовработените лица, за кој се оценува дека го усложнува даночниот систем, ја намалува неговата прогресивност и предизвикува значителни загуби во буџетските приходи.
Европската комисија препорачува Италија да продолжи со борбата против даночната евазија, да ги намали даночните ослободувања и да ги укине субвенциите кои имаат штетно влијание врз животната средина, со цел даночниот систем да стане пофер и поповолен за одржлив економски раст.