Во текот на вчерашниот ден се случија четири оставки, по пожарот во Тетово во средата вечер, во кој загинаа 14 лица.
Најпрво оставките ги обелоденија директорот на тетовската болница Флорим Бесими и економскиот директор на болницата Артан Етеми.
Потоа на ист чекор се реши и заменик министерот во министерството за здравство Илир Хасани, за на крај во 19 часот на прес-конферениција се повлече и министерот за здравство Венко Филипче.
Филипче кажа дека понудил оставка во пишана форма до премиерот Зоран Заев и дека тоа го сторил од морален чин.
„Како лекар и министер имам интегритет, и затоа од морални причини понудив пишана оставка до премиерот Зоран Заев. Сакам да се заблагадорам на сите соработници, медиуми, за нивната посветеност и благодарност за поддршката во тешките моменти со пандемијата“, рече Филипче вчера на прес-конференцијата.
Опозициските партии ВМРО-ДПМНЕ и Алијанса за Албанците, пак, истакнаа дека оставката на Филипче и на другите не е доволна, и дека треба оставка да поднесе и премиерот Зоран Заев.
Претседателот на Владата вчера не се изјасни дали ја прифаќа или не оставката на Филипче и се очекува тоа да го стори во текот на денешниот ден.