Град Скопје од понеделник ќе огранизира маалски концерти, за граѓаните да ги следат од своите балкони, и да можат да го потполнат времето додека трае полицискиот час. Овие концерти ќе бидат дел од акцијата „Култура во време на корона“ организирана од Градот, а ќе опфаќа и посета на зоолошката градина и концерти.
Сите кои ќе бидат опфатени со овој проект, ќе добиваат минимална плата од 14.500 денари, и така уметниците ќе може да заработуваат од кризата, со оглед дека сега немаат никакви ангажмани поради пандемијата и забраната за движење.
Со „Култура во време на Корона“ се предвидува пренамена на буџетските средства, одложување на неприоритетните капитални инвестиции во културата, загарантиран минимален хонорар за сите ангажирани уметници за време на кризата, како и адаптирање на културните програми на сите градски институции на новите услови на работа.
„Скопје како кандидат за европски град на културата 2028 година мора да покаже дека се грижи за домашната сцена и особено за локалните невработени уметници во овој критичен период за нивниот опстанок. Затоа, го задржуваме истиот буџет за култура, но средствата ги насочуваме кон луѓето и програмите, наместо кон капиталните инвестиции. Луна Паркот како неприоритетна инвестиција ќе биде одложен за некоја година, но затоа Универзалната Сала и веќе започнатите реконструкции во градските институции ќе се реализираат. Предвидуваме и кратење на буџетите за оние меѓународни настани кои што нема да може да се одржат заради затворените граници и нивно пренасочување во проекти на домашни уметници и здруженија. Ги уверуваме уметниците и културните работници дека нема да бидат заборавени, а нашите сограѓани, иако под изменети околности, и оваа година нема да имаат недостиг од културни содржини“, соопшти градоначачникот Петре Шилегов.