Американскиот секретар за одбрана, Пит Хегсет, на 21 јули му изјави на Конгресот дека војната со Иран досега ги чинела Соединетите Американски Држави 37,5 милијарди долари, во споредба со речиси 29 милијарди долари колку што беше проценето во средината на мај.
Тој го бранеше барањето на Пентагон за околу 67 милијарди долари дополнителни средства.
Сведочејќи пред Комитетот за буџетски распределби на Сенатот, Хегсет и генералот Ден Кејн, началник на Здружениот генералштаб, изјавија дека дополнителното финансирање е „итно“ и „неопходно“ за да се покријат трошоците за воените операции до крајот на септември.
Демократската сенаторка Џин Шахин го доведе во прашање барањето за дополнителни средства, тврдејќи дека Пентагон сè уште има 75 милијарди долари неискористени средства и праша зошто се бараат повеќе пари „наместо да се побара одобрение за пренамена“ на постојните средства.
Хегсет одговори дека тие средства веќе се распределени за други приоритети, вклучително и за проектот за противракетна одбрана наречен „Golden Dome for America“ („Златна купола за Америка“).
Демократските и републиканските законодавци, исто така, побараа од американската администрација поголема јасност за нејзината стратегија на Блискиот Исток, откако војната во Иран започна кон крајот на февруари со нападите на САД и Израел.
Во меѓувреме, Централната команда на американската војска (CENTCOM) соопшти дека „успешно ја завршила“ единаесеттата последователна ноќ на напади на 21 јули, насочени кон „ирански оперативни центри, поморски капацитети, хангари за авиони, објекти каде што се чуваат дронови и воена логистичка инфраструктура“.
CENTCOM соопшти дека целта на нападите била дополнително да се ослаби способноста на Иран да ги загрозува трговските бродови во Ормутскиот Теснец, по повеќе од 30 напади врз трговски бродови во последните три месеци.
Командата наведе дека овој морски премин останува отворен и го повтори тврдењето дека американските сили помогнале да се обезбеди безбедно поминување на околу 900 трговски бродови и 450 милиони барели сурова нафта низ Ормутскиот Теснец од почетокот на мај.
Во меѓувреме, на 22 јули иранската војска соопшти дека извршила напади врз американска воена база во Кувајт. Според соопштението, иранската војска „пред неколку часа изврши напади со дронови врз складишта за муниција и логистичка опрема во седиштето на копнените сили на американската војска во кампот Доха, кој се наоѓа западно од Кувајт, како одговор на континуираните американски напади врз Иран“.
Американската војска сè уште нема дадено коментар за ова тврдење на Иран.