Илјадници ученици, студенти и наставници денеска излегоа на улиците низ Грција, барајќи поголеми финансиски средства за образованието, подобри услови во училиштата и на универзитетите, како и помал број ученици во паралелките. Слични протести се одржуваат и во други европски земји.
Според податоците на полицијата, околу 10.000 луѓе – меѓу кои многу ученици и студенти – мирно протестираа во центарот на Атина и во нејзините предградија. Демонстрации се одржаа и во други грчки градови. Учесниците изразија солидарност со демонстрантите во Франција и во други европски земји, каде што граѓаните, исто така, протестираат против зголемените трошоци за живот и влошените услови во образованието.
„Од Грција до Франција, сакаме јавно и бесплатно образование“, извикуваа демонстрантите пред грчкиот Парламент. Демонстрациите вршат дополнителен притисок врз владата на премиерот Киријакос Мицотакис, пред која претстојат избори во средината на 2027 година.
Грците со години се соочуваат со бавен раст на платите, високи кирии и вртоглаво високи сметки за енергија, како последица на долготрајната должничка криза во земјата.
Протестите денеска предизвикаа потешкотии во функционирањето на некои јавни училишта и болници. Наставници од основните училишта и лекари, исто така, се приклучија на демонстрациите, изразувајќи незадоволство од ниските плати и недостигот на кадар. Пред почетокот на протестите, министерката за образование Софија Захараки изјави дека ги разбира барањата на учениците и студентите. Захараки призна дека високите трошоци за домување претставуваат товар за грчките домаќинства и најави дека во тек се проекти во вредност од над 733 милиони евра. Средствата се наменети за изградба на нови студентски домови и проширување на постојните капацитети.
Грција се опорави од должничката криза што траеше од 2009 до 2018 година. Во тој период, платите и буџетските средства за образование беа намалени како дел од мерките за штедење – што беше услов за добивање три пакети меѓународна финансиска помош, во вкупна вредност од околу 290 милијарди евра.
Иако оттогаш платите се зголемија, куповната моќ на многу Грци останува меѓу најниските во Европската унија. Таа дополнително е намалена поради инфлацијата и наглиот пораст на цените на горивата, поврзан со војната во Иран.
Просечната месечна плата во Грција изнесува околу 1.500 евра, додека кириите продолжуваат вртоглаво да растат. Како резултат на тоа, многу млади луѓе веќе не можат да си дозволат да живеат во градовите. Протестите што се одржаа во Грција во последните месеци останаа главно мирни.
Владата на Мицотакис најави дека државните субвенции и другите мерки за помош на домаќинствата и бизнисите во справувањето со високите трошоци за енергија ќе изнесуваат приближно една милијарда евра.