И ДУИ викендов го привлече вниманието на јавноста со продолжението на конститутивната седница на новиот состав на централното Претседателство на партијата. Во саботата во 14:00 часот Интегративците пристигнаа во седиштето во Мала Речица.
Артан Груби повторно во свој стил проговори за времето.
„Мислам дека ќе биде добар ден, исто како и минатиот пат“.
Н: Зошто не одговарате на новинарски прашања, туку зборувате за времето?
„Види, вие прашувате, јас одговарам. Ако сакате да го дадам одговорот што го чекате…“
Н: Вие не сте метеоролог?
„Не, но уживам во денот како и сите други“.
Ако на првиот состанок атмосферата беше многу вжештена и се зборуваше за откази и кој подобро ќе се смее, првиот или последниот, овој пат Интегративците делуваа поопуштено.
„Не, не е одговорност на претседателството да прави оценки за именувања или разрешувања, тоа е дебата и анализа за работата на избраните функционери и на работата на партијата воопшто, вклучително и актуелните настани“, вели Бујар Османи.
Сите влегоа внатре, а последен дојде Муса Џафери. Средбата започна и се очекуваше да трае до полноќ како и обично.
Всушност, се заврши во 1:30 по полноќ, кога пред медиумите се појави лидерот на ДУИ, Али Ахмети.
„Се слушнаа забелешки од сите членови на претседателството за извештајот на извршната власт. Оние забелешки кои се аргументирани се прифаќаат за да се подобри работата и да се реализира изборната програма“, посочи Али Ахмети.
Запрашан за судирите во групите во неговата партија, Ахмети одговори:
„Не се ни обидувајте да ги прекинете дебатите на ДУИ или различните мислења. Јас сум од оние кои не би се согласиле да се задуши различното мислење, но на крајот мора да се почитува мислењето на мнозинството. Дури и демократијата има свои граници, тоа значи дека во демократијата не е дозволена анархија, дозволена е демократија, но не и анархија“, додава Ахмети.
Ахмети нагласи дека овие средби се дел од состаноците на ДУИ, бидејќи, како што додаде, овие средби биле традиционални во неговата партија, но биле паузирани поради пандемијата на корона вирусот.