Италијанскиот министер за надворешни работи Антонио Тајани денеска изјави дека се залага за суспензија на Шпанија од Шенген-зоната, откако илјадници мигранти нелегално пристигнаа во шпанската енклава Сеута од Мароко.
„Го поддржувам затворањето на Шенген-просторот кон Шпанија“, напиша Тајани на социјалната мрежа „Икс“, осудувајќи ја, како што наведе, „нерегуларната и неконтролирана миграција“.
Според шпанската Цивилна гарда, мигрантите ја преплавиле границата на северноафриканската енклава Сеута, совладувајќи ги полициските сили кај градскиот бранобран, откако допливале од мароканската страна. Во инцидентот животот го загубиле девет мигранти, додека шпанските вооружени сили испратија дополнителни 60 припадници како засилување на полицијата.
Шпанската државна телевизија ТВЕ објави дека границата ја преминале меѓу 2.000 и 3.000 млади лица. Државната новинска агенција ЕФЕ, пак, пренесе дека стотици мигранти биле забележани како се искачуваат преку заштитната ограда и влегуваат во Сеута во момент кога тој дел од границата не бил под полициски надзор.
Сеута, заедно со Мелиља, е една од двете шпански автономни енклави во Северна Африка и претставува единствена копнена граница меѓу Европската Унија и Африка. Двата града периодично се соочуваат со масовни бранови мигранти кои се обидуваат да стигнат до европска територија.