Италија ќе ги стави сите свои 27 поголеми градови – од Трст на север до Палермо на југ – под највисоко ниво на тревога поради екстремните горештини, бидејќи четвртиот топлотен бран што ја погодува земјата ова лето дополнително се засилува.
Црвеното ниво на тревога означува зголемен ризик по здравјето на целото население поради екстремно високите и продолжени температури, со што се зголемува можноста за појава на вонредни здравствени ситуации.
Италијанското Министерство за здравство соопшти дека во средата 25 градови биле под црвена тревога, а во четврток на листата ќе им се приклучат уште два. Ова е првпат годинава сите 27 градови што се следат преку националниот систем за мониторинг на топлотни бранови да бидат ставени под највисок степен на предупредување.
Во изминатите денови температурите во некои делови на Италија се приближија до 40 Целзиусови степени. Поради тоа, властите ги повикаа граѓаните да избегнуваат директно изложување на сонце во периодот од 11:00 до 18:00 часот, да престојуваат во затворени простории секогаш кога тоа е можно и да пијат најмалку 1,5 литри вода дневно.
Дополнителните препораки вклучуваат избегнување газирани пијалаци, кафе, алкохол и обилни оброци, носење лесна и светла облека, како и никогаш да не се оставаат деца или домашни миленици сами во возила.
Според научниците, овој екстремен топлотен бран, поттикнат од климатските промени предизвикани од човековата активност, нема да ослаби најмалку уште една недела.
Европа се загрева приближно двапати побрзо од глобалниот просек, предупредуваат научниците.