САД ја поздравија изборот на Радмила Шекеринска за нов заменик-генерален секретар на НАТО, истакнувајќи дека тоа покажува дека сите 32 сојузници имаат важна улога во иднината на Алијансата, без оглед на времето на нивното пристапување, пишува Гласот на Америка.
Според портпаролот на Стејт департментот, изборот на Шекеринска нагласува дека секоја земја во НАТО обезбедува суштинско лидерство. Генералниот секретар на НАТО, Марк Руте, ја опиша Шекеринска како вистински лидер, кој ја разбира важноста на членството во Алијансата.
Во одговор на прашањето на Гласот на Америка, Стејт департментот нагласи дека САД го ценат партнерството со Северна Македонија и веруваат дека изборот на Шекеринска ќе ја зајакне безбедноста и стабилноста во регионот на Западен Балкан.
Шекеринска, која ќе ја преземе функцијата подоцна оваа година, на социјалните мрежи изрази благодарност и посветеност за работа со сојузниците за посилна Алијанса.
Нејзиниот избор беше поздравен од политички фигури и амбасадори, вклучувајќи ја и американската амбасадорка во Скопје, Анџела Агелер, која го истакна искуството и експертизата на Шекеринска, како и улогата на Северна Македонија во НАТО. Шекеринска претходно беше вицепремиерка за европски интеграции и министерка за одбрана, вклучително и кога земјата влезе во НАТО во 2020 година.